「突手」跑馬仔已經去到養和院彎，星期日先有一個論壇，三位主持有兩位都係「奶粉」，助攻畀「奶媽」之餘，仲不斷圍攻「古月」，好彩「古月」果然係法官出身，臨危不亂。對於「奶媽」話佢冇行政經驗，「古月」就以加拿大現任總理杜魯多為例子，之前欠缺行政經驗都一樣可以做高民望領導人。
講真經驗到底係正面定負面，都真係冇絕對，好似朗尼夠多經驗，但就成為球隊負累，不過同樣係老將，卡域克（圖）喺曼聯就真係好重要。曼聯上仗聯賽打多個都失分畀般尼茅夫，伊巴謙莫域射失12碼當然係關鍵，但領隊摩連奴嘅調動都真係好有問題，原本下半場初段圍攻般茅，但摩佬竟然收起卡域克，換入費蘭尼，令紅魔攻勢當堂弱晒。
35歲嘅卡域克無疑係老咗啲，但老鬼波有老鬼波嘅好處，好似控制中場節奏同左右分邊咁，但當佢離場，由保羅普巴發辦，就失晒平衡。其實卡域克都算係英格蘭上一代最全面中場，只不過同期有「雙特」，影響佢出場機會。曼聯季尾就幫卡域克搞紀念賽，但如果唔同佢續約，最大損失都係曼聯自己囉。
文：牽牛