獅子行近排出現人事變動，喺保險業界相當資深嘅滙豐保險亞洲行政總裁（CEO）阮瑞芬（Candy），原來無幾耐前已經辭咗職，佢同華華講話想唞吓，唔知係有好路數，定係因為近年監管政策多多，做保險壓力越來越大呢？
華華前排喺一個保險業論壇遇到Candy，佢承認自己辭咗職，問佢有冇跳去邊間公司，佢話想有個career break，冇特別講去向。滙豐就話多謝佢嘅貢獻，同埋祝佢愉快，但未講邊個將會頂替佢個位。
Candy喺業內相當資深，90年代英國牛津大學數學及計算系畢業後，做過好多間保險公司嘅高層，包括友邦香港、中銀人壽、AXA安盛、永明金融、大都會人壽，當中大都會同中銀仲係CEO級職位。