花旗香港炒房一向人才輩出，花旗前大中華區金融市場及證券服務主管兼香港區司庫莫兆鴻（Paulus）啱啱升職統領台灣區，出任花旗集團台灣區CCO，大家都好關心Paulus以前個位由邊位接任。
花旗噚日就宣佈，搵嚟本身睇開亞太區嘅證券服務部主管David Russell（大衞羅素）兼任香港區金融市場及證券服務主管一職，至於香港區司庫個位就未公佈。
花旗素有銀行界少林寺之稱，好似前財爺梁錦松、已退休嘅花旗集團前執行委員會成員兼執行副總裁黃逸思、資深銀行家陳子政同現任中銀香港（2388）投資主管陳少平，都曾經係花旗人。
Russell雖然係「老外」，但1992年已經調來香港，2002年加入花旗，負責管理發行人業務、證券融資、託管及基金部門等等，坐得呢個位當然有番啲實力。