最近港鐵拍廣告，煞有介事呼籲乘客放下背囊，短片開場，只見一背囊客撞來撞去，其他乘客面露不悅，此時旁白說：「唔理你咩嘢人，搭港鐵最怕碰上嘅一定係呢類『孭嘢人』。」很多市民看後氣憤難平，其實各國地鐵公司皆有「禮儀指引」，如兩年前紐約地鐵掛上標語牌，列出乘客當守規則，包括「Take Your Pack Off Your Back」，新加坡地鐵亦有「Bags Down」等。營運巴黎地鐵的RATP，幾年前亦製作小冊子，給公眾說明乘車禮儀，舊式教科書畫風插圖，配以生鬼標語，例如有一句玩食字，意譯如下：「乘車有禮，就是莫把手機變轟炸機（C'est ne pas faire de son portable un insupportable）。」可見港鐵宣傳短片，不過意圖「跟國際接軌」，但問題是：香港人最怕喼神，其次還有門神，幾時輪到寧采臣？
我睇完廣告都好鬼嬲，最嬲嘅係，既然港鐵認為孭背囊危險過排雲掌風神腿，點可能拍成咁樣樣呢？應該係：寧采臣孭着個三尖八角竹製背囊，右手撐油紙遮，左手執線裝書，在最繁忙的時間搭地鐵。此時，搬運工人燕赤霞突然從他抬進車廂的棺材內，抽出一把七尺長寶劍，對準寧采臣鼻尖，大聲叱喝：「放低個背囊佢！」寶劍一揮，已有七八個人頭落地，血流成河，寧采臣嚇得線裝書和油紙遮都掉在地上。
燕赤霞見他只是放下書和傘，怒不可遏：「我係叫你放低個背囊佢呀！」說着又橫劍一揮，左右幾個乘客當場身首異處，鮮血繼續噴呀噴，車廂亂作一團。寧采臣見他為區區一個背囊，居然瘋狂殺人，忍不住問：「大俠，借問聲……我點解要放低背囊……嘅呢？」
燕赤霞即鳳眼圓睜，劍眉倒豎，怒道：「因為你個背囊會撞親人㗎！」畫面一黑，然後身穿軍裝的任達華出場了，他義正詞嚴指着你說：「仲孭？啲乘客畀你撞死晒啦！」
廣告，應該是咁拍的。