「明日看雨點灑到滿天 總會掛念 我會隱藏我淚線 Yeah～Yeah～」「迷你版方皓玟」潘希晴（包包）得6歲人仔，唱《分手總約在雨天》唱到七情上面，肉緊到連原唱方皓玟、甚至fb瓊姐都忍唔住share大讚，唔通佢喺感情路上已經飽歷滄桑？包包大方分享佢嘅「愛情觀」：「分手即係分開對手，唔再做朋友。我冇分過手，因為我唔係大人嚟o架！」
包包九月升小一，喺佢身上搵唔到「老積」兩個字，反而仲有「too simple, sometimes naive」嘅純真，全靠有位「不怪獸家長」。包包爸爸Derek係80後，對好多家長嚟講，子女升小學就係「打大佬」，不過Derek驚都未驚過：「我哋一個訓練班、面試班都冇參加過，其實只要適合佢嘅學校就可以，唔係名校一定好。」問到囡囡覺得爸爸係咪怪獸家長，包包即刻搶答：「唔係！因為爸爸冇成日鬧我，仲有佢好斯文o架！佢哋(父母)係我心肝寶貝。」答得搞笑又sweet到爆！
最近網上流傳，有家長要小朋友學A for Assiduous，B for Blameful，但係包包識嘅係C for cheerful。Derek笑話：「可能我扮怪獸同佢哋玩，多過要佢哋操乘數表、背好深嘅中文。佢而家應該要做嘅，就只係玩同埋玩。」對於小朋友嘅學習，Derek有自己一套睇法：「佢用玩樂時間去學嘢，會吸收得快過揸住本書背嗰啲字。」的確，Derek設計咗一個地鐵遊戲，每到停站就把握時間，同包包跑到站名前影一張相，然後走番上車，時間限制令小朋友覺得緊張刺激，特別好玩，唔知唔覺學識晒啲站名，仲記得每個站係咩色！Derek又定咗星期五晚係Ice Cream Day，一家人齊齊食雪糕、畫畫輕鬆下。Derek話都有朋友笑佢好無聊、嘥時間，不過佢樂在其中，「而家要學識玩，同學識點去做小朋友！」
對於包包即將升讀小學，Derek希望政府可以取消TSA考試，減少學童壓力：「要操到佢變成一個考試機器，係咪真係有意思呢？喺街度見到有個媽咪，叫小朋友一定要背哮喘嘅英文，個小朋友好唔開心咁話唔背。一個小朋友如果冇創意、冇好奇心，其實佢已經唔係一個小朋友。」
如果一個社會走錯路，小朋友就自然會走冤枉路，Derek語帶無奈表示：「吳克儉話可能會退休，咁我希望佢真係退休，唔好再害啲小朋友喇！下屆特首邊個都好，希望佢可以為我哋下一代着想，積番啲福。小朋友冇咗童年係一件好悲慘嘅事。」
問到包包想唔想好似方皓玟一樣成為歌手，小妹妹答得率真：「唔會，因為會出好多汗，好攰㗎。」原來佢已另有想法：「我第時想做醫生或者護士，因為我鍾意白色嗰啲衫，因為醫生會幫人、救人。」對於囡囡未來發展，Derek話佢長大後想做咩都冇所謂，最緊要健康快樂成長，「成功嘅時候我陪佢一齊，失敗嘅時候都陪佢一齊。」
後記
問到Derek最愛方皓玟邊首歌，Derek毫不猶疑揀咗《你是你本身的傳奇》。活著就無悔地，做個你愛的你。得與失可能無法躲避，但如果有家人摯友做你嘅避風巷，即使落雨，又有咩好怕喎。天公不造美，幾經風浪也是你。
採訪：何宛珊(表妹)
攝影：馮峰、Teddy
後期：Roy
編審：Kaman、仙