選舉絕對唔可以靠一時三刻，最重要係長期備戰儲定子彈。雖則九龍西補選日子未有定案，暫時亦未知到底係只補選因為青政游蕙禎被DQ後嘅一席、抑或有可能因應劉小麗嘅覆核案而同時補兩席？不過民主派已經做好作戰準備，八方聽聞民主黨同公民黨已經喺泛民陣營表心迹，準備派新丁練兵，無論輸贏都見識下大場面。
雖然兩黨未有講明出戰代表，但聽聞初步都有心水人選。民主黨極有可能派喺深水埗區荔枝角中區議員袁海文上陣，而為公民黨披甲嘅則有可能係油尖旺區富柏區議員余德寶，前者現年30歲，後者則26歲，同樣都係卜卜脆嘅政壇新鮮人，兩位近期都好積極，全面開動地面同網絡戰。
但除咗佢兩個，有民主派相信若然劉小麗被DQ，小麗代表嘅本土自決派都會派員落場，泛民若要協調一人出選，都係高難度動作，難怪有人早於呢個時間已經摺起衫袖準備爭出線！