外號「大支嘢」嘅伊巴謙莫域上場聯賽開踭打人，被秋後算賬，好大機會被罰停賽三場，冇得喺下周一對車路士場英足盃八強上陣，對曼聯嚟講真係幾大劑。因為曼聯今季進攻真係靠晒伊巴一個，而且對手車路士嘅狀態又弗，啱啱周一喺英超輕鬆贏咗韋斯咸2:1，喺聯賽榜帶到離晒巷。
英超扑槌等足總盃鬥魔
英格蘭足總前日宣佈，決定起訴曼聯前鋒伊巴同埋般尼茅夫後衞泰朗明斯，認為佢哋喺上周六場英超作出暴力行為。喺嗰場波嘅上半場末段，明斯一腳踩咗落去伊巴個頭度，而伊巴之後報復，向明斯開踭，但球證都睇唔到呢兩吓，所以冇畀牌佢哋。照計呢兩吓都係可以直紅嘅危險動作，所以估計指控成立的話，伊巴同明斯都至少被罰停賽三場。曼聯嚟緊三場國內比賽先要喺下周一踢英足盃八強作客車路士，其後就會踢聯賽對米杜士堡同埋西布朗，如果伊巴呢三場都停賽唔出得的話，都對紅魔有好大影響。
曼聯今季進攻靠晒伊巴，拉舒福特同安東尼馬迪爾兩位後生仔都孭唔起飛，加上對手仲要係車路士！車路士今季喺英超帶開成條街，喺周一場聯賽，佢哋靠夏薩特同迪亞高哥斯達各入一球，作客以2:1贏咗末段有蘭仙尼破蛋嘅韋斯咸。家陣車路士以66分排英超榜首，領先第二位嘅熱刺有10分咁多！車路士除咗狀態好之外，又唔使好似紅魔咁要分心歐洲賽，佢哋有一個星期休息，備戰下個禮拜一對曼聯。相反，曼聯禮拜四就要作客羅斯托夫踢歐霸盃。走勢唔夠車仔好，賽程又密，若果冇埋伊巴的話，睇嚟曼聯好可能喺英足盃八強出局。
伊巴愛更衣室露鳥
講開伊巴，原來呢位瑞典射手喺球會入面有個花名叫「Big Man」，如果就咁按字面譯嘅話，可以叫「大隻佬」，但知道埋背後意思嘅話，就應該譯做「大支嘢」先準！據聞初頭曼聯職員聽到球員之間提起呢個名，以為因為伊巴身材高大，先會有個咁嘅花名，但之後大家都發現，呢個名原來仲有一層背後嘅意思。呢位內部人士話：「其他球員沖完涼之後，都會圍番條毛巾先出嚟，係伊巴鍾意乜都唔着周圍走。佢對自己好有信心，其實一睇就知點解。」