【爆相爆片】莊思敏向來跟是非有緣，大前日（3月5日）是廿四節氣的「驚蟄」，屬打小人專區的灣仔鵝頸橋這天例必人頭湧湧，除了有公司組團打小人，就連大馬拿督女莊思敏都加入打小人行列，更不介意跟其他人一齊踎凳仔排隊。
全神貫注
讀者陳先生透過《蘋果》的爆相爆片，分享他於過去的周日，在灣仔鵝頸橋底發現莊思敏，指當日素顏的莊思敏同行有一位女友人，二人到埗後即混入人群當中。
陳先生表示：「當時見到莊思敏同個女仔friend排隊，佢哋坐低就同小人婆傾咗一輪，之後小人婆開始打啦，見莊思敏個樣有啲緊張咁，定晒神望住小人婆。」陳先生又透露：「佢打咗十幾分鐘先打完，我打一個都係一分鐘，之後見莊思敏攞咗張500蚊出嚟，找番150蚊，計小人婆收50蚊一個，即係話佢總共打咗七個人。」
趕走瘟神
打小人打足七個？《蘋果》前日聯絡莊思敏，她承認有去鵝頸橋打小人：「係多年習俗，唔打唔舒服，年年『驚蟄』都要祭白虎㗎喇！志在可以擋吓身邊嘅口舌招搖是非。我屋企人都有拜開神，年年都會去攝太歲，總之唔同節日就拜唔同嘅神，叫做同佢哋打個招呼。」
有讀者指她疑似打足七個小人，莊思敏即說：「我嗰日打咗兩份咋嘛，其他我朋友打，都冇特定要打邊個嘅，純粹係拜吓神，求個心安理得，我又唔係有乜嘢復仇大計嘅，只係想趕走身邊啲瘟神啫！」去年莊思敏跟王宗堯爆罵戰，問她會否順手打埋？她避而不談：「呢個人都唔會點見㗎啦，同佢可免則免，少啲交集好。」
採訪：王梓嫚