噚日港鐵（066）公佈業績，身為主席嘅馬時亨一向冇去業績會，但咁啱佢出席咗城大舉辦嘅「2017探索創新節」頒獎典禮，睇一班90後嘅創作成果。今年係探索創新節第5年舉行，上年嘉賓就有創科局局長楊偉雄。
身兼城大榮譽社會科學博士嘅馬時亨，到場為「我的探索比賽」得獎學生頒獎，睇過同學設計嘅幾件展品。其中一名得獎者係城大機械及生物工程學系三年級林華盛（Henry），作品係幫行動不便人士自行上車嘅「自動變形輪椅」，用者可透過屏幕控制輪椅座位升高、前移，將身體移動去的士後座，研發成本約3,000蚊。
馬時亨致辭時講到，世界轉變得太快，所以發明新事物同創新十分重要，唔知主席睇過學生嘅發明後，會唔會引入啲創新科技喺港鐵設施度呢？