幼兒學生應該學啲乜，教育專家有不同講法，各有理論根據。香港家長就主要跟隨一種做法，就係迎合名校升學需要，千方百計打聽聖保羅男女，男拔女拔喇沙英華諸校嘅取錄小一學生要求，盡量配合，讀幼稚園是專為升讀名小學作準備，如此方有保證進入著名中學，跟住比較有把握考入大學；另一條途徑就係讀英語國際學校一路上，希望直入哈耶牛劍史丹福，為咗咁，甚麼教育專家理論，話之佢啦，正因如此，有啲朋友大罵教育局唔准幼稚園學生寫字係堅離地。
沙田陳太在家湊孫，兩個孫女已入讀幼稚園，又有乜想法呢？陳太話：「讀嘅係所謂國際幼稚園，用英文及普通話教學，大嗰個外孫女已學寫字嘞，寫一，二，三，四囉，佢又覺得好容易，好快寫完咪去玩囉，冇乜嘢呀，我暫時搵唔到禁止佢學寫字嘅理由。」或者以後愈寫愈多，操到幼兒好辛苦呢？陳太話：「咁就唔知，如果能夠循序漸進，慢慢嚟，唔好逼，應該冇問題，中文係象形文字，我見外孫女寫字似畫畫，唔識跟筆劃，佢好鍾意畫畫嘅，得閒就揸住顏色筆去畫，學寫象形文字最啱。」
要令幼兒自己有興趣學習，唔好強迫，要順乎自然。沙田陳太個內孫女未夠三歲，背詩當唱twinkle twinkle little star，阿嫲教一句，佢背一句，已識：「牀前明月光」，「遊子身上衣」，「人之初，性本善」（三字經識背大約二十句）；用廣東話，普通話，日語，英語，西班牙語（跟菲傭學）去數數目，由一到十，非常純熟，故此陳太呢位阿嫲話：「我發覺日常生活知識灌輸，唔係認真嚴肅咁教書，兩個孫女嘅吸收能力都好快，學習不同語言似學唱Elsa嘅Let it go，菲傭教我講西班牙文，一，二，三，四，我幾十歲人，轉頭就唔記得晒！」不過細路好鍾意睇電視，一放學回家就話要睇「一陣電視」，一陣又一陣，好快就變成一個小時以上，陳太發覺唔係辦法，與孫女講條件，（幾十歲人與四歲孫女談判都幾得意），每日下午放學回家，要先上床睡一至二小時，醒後做學校習作（例如寫字）約半小時，跟住就可以睇電視卡通（BBC英語卡通）一小時，之後就熄機食晚飯，其他如手機唔准睇，iPad唔俾用，電腦YouTube間中睇一次，盡量要兩孫女用多啲時間睇故事書及畫畫，煑飯仔……睇故事書其實即係由阿婆逐頁揭嚟講解，阿婆要好有耐性至得，但兩孫女鍾意到極，愛上了書本。啲書梗係由媽媽去兒童書局搜購啦，中英文不拘，幼兒自小養成聽讀故事書習慣，長大後不愁佢怕咗讀書。