「無謂追、無謂追，追得到也未必好。」NBA上季冠軍騎士，趁自由身市場關閉前簽入兩個老將，增加衞冕籌碼，不過新兵之一保格（Andrew Bogut）就慘慘豬，地標戰兼上陣加埋只係58秒，就因為脛骨骨折，要無限期休戰，騎士就真係得物冇所用。
「黑腳」累騎士負熱火
保格本身係勇士冠軍成員之一，今次轉投騎士，連「大帝」勒邦占士（LeBron James）都讚係好收購；周一主場對熱火，保格終於上陣，第一節打咗35秒，第二節開波僅僅23秒，就因為想做單擋，同熱火嘅O韋特相撞，保特亦隨即痛苦倒地，要隊友攙扶離場。隊醫照完X光，發現呢位32歲老將脛骨骨折，無限期休戰，睇嚟今季都唔使預佢。騎士折將之餘仲輸波，熱火後衞韋達斯（Dion Waiters）倒戈大發神威，三分波九射五中，全場累積29分，協助熱火作客106:98贏波。