有冇諗過搭瑪嘉烈揸嘅車？ViuTV電視劇《瑪嘉烈與大衛系列——綠豆》入面，瑪嘉烈男友大衛一直係佢嘅柴可夫，由的士到Uber都經常接送。今日大家就有機會成為大衛，同飾演瑪嘉烈嘅周家怡一齊搭Uber！
Uber為響應國際婦女節，搵嚟周家怡變身Uber司機，四出載客。點解揀周家怡？據聞除咗《綠豆》劇情配合，仲因為周家怡性格夠爽朗，相信坐到佢嗰程車，一定好好傾！
大家只要今日中午12點起上Uber app call車，就有機會抽中周家怡帶你去兜風。Uber會捐出今日女司機所得車資嘅相同金額，畀婦女慈善機構「心蓮心」。
唔講唔知，全球Uber女司機已達40萬名，香港約有1,000名，佔本地Uber司機不足一成，大部份都係想幫補家計。
喺自家補習社幫手嘅家庭主婦Casey，送仔女上學後揸幾個鐘Uber，每個月賺到近5,000元；另一名網上波鞋店老闆阿一，日頭打理生意，多數夜晚出車，月入亦近6,000元，笑指可幫補買樓嘅裝潢費。