特首寶座花落誰家？3月26日投票後就有結果，如果最終唔流選嘅話……查實呢場選戰，唔少派別似乎都想做Kingmaker，西環總動員捧林鄭月娥，民主派奮力撐曾俊華，個個都搏晒老命，大晒影響力，但查實最能左右結果嘅，可能係陳智思（Bernard）喎！皆因除咗佢自己身任林鄭競選辦主任，身為佢公司董事嘅黎高穎怡，則係薯片叔嘅競選辦秘書長，即係兩邊核心都有陳家份，嘩，仲唔係真正嘅造王者？
認上年曾向曾俊華招手
專欄作家左丁山早於1月初已經喺專欄透露，陳智思家族係亞洲金融集團（控股）有限公司嘅大股東，董事會成員就包括撐薯片嘅黎高穎怡（獨立非執董兼薪酬委員會主席），兩大陣營嘅大參謀都係出自同一公司，非常有趣。
據聞建制派因此都成日笑Bernard喺呢場選戰，有舉足輕重嘅影響力，直情係左右逢源；但若然時光倒流，梁振英唔放棄爭連任嘅話，Bernard可能同樣喺薯片叔營，唔會有呢次自己人對壘情況喎。
Bernard都認㗎，身兼港區人大代表嘅佢喺北京接受傳媒訪問，承認去年11月曾經主動向薯片叔指肯支持佢選特首，仲願意畀提名㖭，想選委有多一個選擇，但其後林鄭宣佈參選，一切逆轉。Bernard都同八方講過，梁振英同林鄭係兩個唔同嘅人，當參選嘅人易角，佢再重新考慮都係正常，讚林鄭係合適人選，況且佢同林鄭過往確實不時合作。
既然助拳林鄭，若然香港喺3.26後有首任女特首，Bernard會唔會入閣？Bernard事先聲明，佢有自己嘅事業同工作，冇可能放棄而加入政府做全職，相信林鄭會搵有志又肯付出嘅人加入班子。咁加入行會兼做召集人又如何？Bernard話喎，仲未同林鄭傾呢個問題，強調𠵱家最重要係勝出選舉。除咗林鄭同曾俊華，另一候選人係胡國興。
李八方