挪威作為北歐四國之一，除了三文魚，亦以高福利同石油聞名於世，其實挪威在1969年發現油田之前，只是一條靠捉鯡魚（註）維生嘅小漁村，其後發現油田發大達！香港亦由小漁村靠轉口港以至旅遊地產發大達，與挪威發迹史相若，不過本港地產巨富卻掌握喺少數人嘅手中，挪威卻係行維京文化嘅均富政策。
挪威目前擁有70個鑽油台，每年靠石油進賬400億美元，挪威亦曾經將石油收入大手投資基建，狂加公共開支，造成所有人衝入石油行業想致富，加上外國人湧入投資推升當地貨幣，導致出口品貴到無人買得起。挪威經濟失衡，直至80年代，當地人深明石油最多玩多70年就會完結，挪威決定自己搞石油產業，再將國有石油公司80%收入上繳石油基金，唔再學新興國家咁大肆投入基建，即合併後的挪威養老基金，預期2020年挪威養老基金規模將達1.1萬億美元。挪威再大手減稅，刺激社會石油以外的各行業發展，重組經濟，多元發展，石油收益俾人扣起，有高福利支持，想發達有空間大肆發展，自己諗辦法！
香港依靠地產創造的巨大財富，掌握在地產商同政府手中，如果一起初政府自己搞地產，今時今日社會發展可能更均衡。挪威政府係好少動用石油基金，確保石油收入可以慢慢畀後世共享，從無赤字，香港政府口頭話幫你儲起佢，一轉身就拎去起垃圾基建，變身二世祖、大花筒，豪擲百億又百億搞基建，香港轉口港已經玩完，旅遊、地產又可以玩多幾耐？不過，挪威人都話，佢哋經濟模式只適合用於人民高度信任嘅政府，香港呀，你話呢？
註：鯡魚就係北歐人最愛，北歐人鍾意用鹽醃鯡魚罐頭搽麵包，不過有港人形容係「臭襪+死老鼠味」，臭過臭豆腐，各位去北歐有膽可以一試
Melody
http://www.facebook.com/whichroad
本欄逢周三刊出