由葉偉信導演、古天樂、泰國動作演員Tony Jaa、林家棟、盧惠光同蔡潔主演嘅電影《貪狼》，下星期一會喺灣仔會展舉行嘅香港國際影視展舉行記者會，到時一班藝人都會到場宣傳。套戲由太陽娛樂電影集團投資，巴斯福影業發行，近日已廣發邀請函畀各大院商同傳媒，邀請佢哋當日出席。
又貪又愛女
其實《貪狼》個名已經令人好有聯想，貪狼原本係講緊紫微星宮入面其中一粒星，其餘仲有破軍、七殺呢啲星。但係好易就會聯想到好多人對行政長官梁振英嘅「暱稱」，最抵死係發呢份通告嘅係一位叫CY Leung嘅人，當然此「CY」不同彼「CY」，實情係任職發行高級經理，仲係一位女士。《貪》片顧名思義喺講一個人嘅貪念同慾望都好強，戲中貪狼嘅喺古仔，同囡囡有一段好感人嘅親情戲。
另外，唔知係咪電影公司都覺《貪狼》嗰名政治唔正確而有打算改名。不過負責套片宣傳嘅梁小姐接受電話訪問時話：「冇聽過，至少呢個moment冇，所有電影嘅物料都做晒。」套片暫定下半年上映，到時梁振英都已經落咗台。
撰文：馮仁昭
