今年嘅北京兩會，港人聚焦特首欽點戰；至於「正經事」，即係人大、政協有咩提案同建議，好似冇咩人關注。身兼港區人大代表嘅自由黨榮譽主席劉健儀查實今年有4個建議，當中有啲熟口熟面，如落實廣深港高鐵香港段一地兩檢安排、深化港區人大作為中港橋樑的角色等，但亦有破格嘢「要求准許旅客攜帶燕窩進入內地」！
原來2012年內地將燕窩納入禁止進境物品名錄之內，香港一向係燕窩市場嘅國際貿易中心兼集散地，禁令一出，業界大受打擊，銷售額大跌超過六成，燕窩價格亦減逾半，所以劉健儀希望內地放香港燕窩業界一條生路。而曾任立法會交通航運界議員嘅佢，繼續關注業界權益，剩下嘅一項建議，則有關放寬沿海運輸權法對香港同內地運輸業界嘅影響。