仲有幾個星期就投票選特首，呢輪個個候選人馬不停蹄想同各界會面，冇票就拉票、有票就箍票咁啦。但有成30個選委嘅會計界（唔計議員梁繼昌），以會計師公會名義搞嘅論壇，就因為唔夠兩名候選人參加，所以取消咗嘞。
公會話，早喺提名期開始之前，已經邀請各參選人出席論壇，即係葉劉、長毛都有份。上星期六公會話胡官已經應承出席，但薯片同奶媽都話唔得閒。論壇冇兩個人辯論就冇意思，所以決定取消。
不過華華聽聞，胡官星期一都撤回，話唔去喇。數埋會計界都有30個選委，而且會計師公會都係財金界相當重要嘅監管機構，竟然冇特首候選人到場，真係令人百思不得其解。有花生友話，可能奶媽見到大部份會計界選委都係黃絲、大部份提名薯片，費事出席面懵懵。
但亦有另一邊嘅花生友話，班黃絲選委晨早話會杯葛呢場論壇，事關班Big 4大佬雖然選唔到做選委，但搞場論壇之前，當成班有票嘅選委冇到，就算胡官、薯片去到都冇運行，兩位唔去都啱數。