張名雅(Carat)仲有兩、三月就臨盤，到時「Mario」就會同大家見面，嗱！新手準媽媽嘅指定動作就係去影番輯陀B大肚靚相，陀住第一胎嘅張名雅依家心情點呢？佢昨日接受傳媒訪問時話：「幾緊張，一路想嘗試調節自己，初初未定順產定開刀，o依家決定係順產，因為我想復原快啲，我同TVB仲有約，同大家都係一樣，都係放十個禮拜產假，之後都係會照工作，我想復原好啲，對BB又好啲。」
選擇自然分娩嘅張名雅，果然係好勇敢，為咗阿仔Mario，唔怕承受十級痛，佢話：「因為我揀順產，所以有好多未知數，唔知幾時生，有早有遲，唔知到時痛到咩程度，形容呢個有十級咁痛，o依家一路準備緊BB嘢，新生媽媽，到時屋企幫手，請咗陪月，又有啲贊助，大家幫手分擔下，冇咁大壓力囉！」
唔知幾時生，咁又真係有壓力，雖然係咁，做媽媽都係想畀最好嘅BB，張名雅講到陀B過程：「一開始冇特別唔舒服，冇嘔過，周圍行來行去，做下運動，唔會日日困自己喺屋企，進入第三階段，不過有啲朋友話我唔似大肚婆，o依家就開始慢，個肚又開始大，食嘢成日頂住個胃，不過，好開心，係一個好開心過程，唔舒服，老公都會幫我按下，搽下個肚，身邊嘅人支持好重要，所以去影咗輯相好開心，第日俾番阿仔睇，叫佢要聽話孝順。」
講到晒溫馨嘅大肚相，佢話：「一早book定，我個肚唔算係好大，唔算係肥咗好多，如果肚唔係太大，影出來唔係咁似大肚，影出來效果我好鍾意，肉眼睇，有時唔係好覺，好多人係後面睇都唔覺得我係大肚，屋企人同朋友成日叫我小心有人喺後面推我。所以今次影到我似大肚婆，我好開心。」