理文手袋賣盤後改名叫百福控股（1488），公司之後密密加碼投資內地餐廳，好似1月就加碼投資內地快餐連鎖店和合谷，轉型做餐飲股。
華華睇番通告，原來公司舊年仲投資咗一間專做重慶小麵嘅「遇見小麵」，小麵創辦人宋奇好後生，係85後，畢業於華南理工大學，之後嚟香港科技大學讀研究生，為累積創業經驗，佢仲走去麥記打工，學習人哋營運模式。
據講好多內地學生為一張香港身份證堅持留港，但宋奇之後就祼辭返廣州，再去到其他食肆，好似百勝旗下肯德基、必勝客打工，邊做邊學國際標準嘅製作流程。
創業初期佢有蝕錢，慢慢試賣後來先成功，仲攞咗幾輪融資。唔知今次百福投資佢，呢碗小麵能否為股東帶來一餐九大簋呢?