噚日有報道話劉鑾雄（大劉）上年能夠換到腎，完全係因為陳凱韻（甘比）嘅家人捐個腎畀佢，救番佢一命，所以甘比先會咁得寵，不單同佢結婚，仲分咗咁多身家畀佢同一對仔女。
「傳聞唔係事實」
傳聞仲話大劉個腎喺英國換，只剩18個月命又話甘比有繼父。傳聞都係問番當事人最清楚，馮仁昭噚日打畀甘比求證，佢話：「呢啲傳聞絕對唔係事實！」其實大劉換腎後，健康狀況係唔錯嘅，成日同朋友打牌打通宵。咁早分身家只不過係為防以後佢有乜三長兩短，防止有人想打爭產官司啫！甘比同劉鳴煒咁快分到身家，真係要多謝某人嘅功勞啦！
甘比以前喺《蘋果》做記者，馮仁昭聽同佢共事過啲記者講，話甘比同家姐陳詩韻、妹妹陳諾韻都係阿嫲湊大，佢老爸一直冇乜照顧過屋企，頭家由媽咪獨力支撐咗好耐，所以甘比中學畢業後，雖然成績好好，可以繼續升讀大學但都放棄咗，寧願早啲出嚟打工幫補媽咪，就係咁入咗《蘋果》打工，等佢同姐姐都出嚟打工搵錢後，佢媽咪就同老公離咗婚，不過離婚後到𠵱家，聽講佢阿媽一直有接濟前夫。
撰文：馮仁昭
