求驗客手記：
曼城贏波迪布尼最有心

喺禮拜日英超，熱刺同曼城齊齊贏波，其中曼城作客贏新特蘭2:0，排緊第三位。呢場最值得一讚嘅係後備入替嘅奇雲迪布尼，佢賽後特登走去看台，送咗件波衫畀一位殘疾球迷，相當有心！

卡巴尼路力保不失

曼城今場佔咗七成控球，圍住對手嚟攻，去到42分鐘，史達寧右邊傳中，阿古路走去前柱接應射成1:0。59分鐘，利萊辛尼接應大衛施華嘅妙傳射成2:0完場。其實新特蘭都有反擊機會㗎，林米尼干尼、比利鍾斯都有攻門，但喺曼城門將韋利卡巴尼路左飛右撲之下，曼城呢場先可以保住清白之身。曼城都冇出盡主力，好似迪布尼去到尾段先換入場鬆吓筋骨。呢位比利時中場賽後冇即刻返入更衣室，而係走去看台，將自己件波衫送畀一個坐住輪椅嘅球迷。迪布尼仲喺波衫上簽名，𠱁到呢位殘疾球迷不知幾開心。