體壇拾趣：
木村沙織排球女神引退

日本一代排球女神告別嘞！曾獲日本男性票選為最想迎娶運動員嘅30歲日本排球女神木村沙織，周日喺日本女排聯賽代表東麗女排以1:3不敵NEC女排，完成職業生涯最後一場賽事後，正式要同球迷講sayonara！
木村沙織喺最後一場唔單止冇揸流灘，更加打到抽筋，要球隊職員攙扶離場！參加過四屆奧運嘅沙織話：「一直以來，我都好享受排球比賽，我要多謝好多人，佢哋一直支持我，我亦想對年輕球員講，千祈唔好睇少自己，要相信自己嘅實力！」
身高1米85嘅沙織曾經協助日本女排贏得06亞運銀牌、10世錦賽銅牌同12倫奧銅牌，而擁有10頭身同E Cup嘅身材，加上充滿親和力嘅笑容，所以一直迷倒唔少男球迷；不過，沙織喺舊年12月已宣告封盤，同日本男排隊員拉埋天窗，退役後可以專心做人妻。