大台人材流失都唔係今日嘅事，有見及此，大台高層不時都會搵啲夠晒卡士嘅舊人回巢，不過呢一班舊人喺「外面」已經闖出一片天，要請佢哋返嚟除咗打人情牌，最緊要梗係要畀啲優待吸引佢哋啦！
羅嘉良
嚟緊就會播出羅嘉良闊別大台螢幕8年之作《與諜同謀》，羅嘉良2007年以部頭合約形式回歸無線拍劇，08年拍完《富貴門》之後繼續返上大陸發展，而喺去年佢就獲邀「回娘家」拍劇，而當時仲有報道指羅嘉良嘅回巢條件非常特別，第一個就係要唱主題曲、第二個就係同新演員合作。
鄭則士
喺2008年回巢返大台嘅鄭則士（Kent哥），5年入面幫大台拍咗5套劇，不過就喺2012年同大台滿約之後，就冇再續約，返大陸搵人仔。而喺2015年大台就再搵佢回巢拍《火線下的江湖大佬》，當時年屆64歲嘅Kent哥回巢梗係有條件啦！有指當時Kent哥要求劇組要非常準時開工同放工，而劇組亦都好錫Kent哥，佢拍嘅劇份主要都安排喺日頭，等Kent哥唔使捱更抵夜。
毛舜筠
毛舜筠「毛姐」近年不時會幫大台拍處境劇，而佢喺2010年嘅《天天天晴》之後，喺去年就回巢幫大台拍《愛·回家之八時入席》，而喺去年底有報道指，毛姐當日回巢條件，全因為係無綫應承會做好製作，做好個劇本，不過最後事與願違，最後套劇喺今年一月完咗，而毛姐再次離開大台。
陳國邦
陳國邦喺2015年時突然喺社交網站post咗封名為「給無綫電視的公開信」講明已離開大台，不過喺兩個月後，陳國邦又突然宣布回巢簽部頭合約，佢仲稱當時被大台及毛舜筠的誠意打動而答應，而條件之一就係遷就陳國邦喺大學嘅教書時間。