有位前特首參選人講過，如果連髮型都捍衞唔到，點捍衞香港治安？職工盟主席吳敏兒（Carol）應該感同身受，因為佢都曾經「護髮」失敗，「畀阿媽捉咗去電髮」。佢細個係男仔頭，當短髮遇上電髮，成個小吉咁，即係《IQ博士》入面同小雲一對嘅活寶貝。
事過也境遷，當年一臉苦瓜愁容，今天笑看風雲。今年46歲嘅Carol話讀小學時，有日陪阿媽去電髮卻中伏，阿媽叫師傅順手幫佢電埋，母令如軍令，冇得上訴，但電完佢又覺得幾爽歪歪，「起身唔使點整個頭，就咁出門口，慳番好多時間」，直至升中先留番長髮。
Carol中學畢業後第一份工係喺銀行做代書小姐，之後轉職做空姐，𠵱家除咗係職工盟主席，亦係香港空勤人員總工會主席同英航香港工會總幹事，經常為勞權走上街頭，又同資方拗手瓜，仲有個外號叫「阿頭」。「由細到大屋企都係男人世界」，Carol上有阿哥下有細佬，不時要爭嘢食、搶玩具，「唔可以因為你係女仔就喊，就要佢畀你……為咗唔畀自己捱餓，唔會搶輸，就要同男仔鬥快」。
自細同男人「爭權益」
喺屋企練得一身好武功，Carol細個仲見盡不公義。父親當差，60、70年代，好多事都要用錢疏通，包括申請警察宿舍，「如果唔畀，申請表格都冇得攞」。後來廉政公署成立，打擊貪污，但事隔40年，不公義又再重臨，最近空總人員入稟司法覆核特首梁振英女兒「行李門」事件，Carol強調要守護航空安全，不容特權，準備好再打一場硬仗。
