恒指噚日反彈43點，表面睇冇奶力，實情係資金避開藍籌股，非指數股份似乎飛到上月球。市況一平靜少少，舜宇（2382）等唔切要搶高，另外備受忽略嘅內房股亦造好。
內房股當中，真正龍頭已經係碧桂園（2007），藍籌中海外（688）、華潤置地（1109）相比之下表現差天共地，理由不盡是基本因素能夠解釋：第一，碧桂園債務槓桿較高，相比潤地同中海外呢類業務防守性較高嘅股份，前者喺升市秤先；第二，作為藍籌股，潤地同中海外成為衍生工具市場地盤，一升就有大量短線客食糊，獲利盤湧現之下冇運行，相反碧桂園同樣千億市值，但冇上述因素拖後腿，仲要不斷回購支持股價，所以股價零舍強。
除咗碧桂園外，雅居樂（3383）圖表顯示短期升浪一樣強，至於富力（2777）走勢相比兩隻藍籌股潤地同中海外為佳，股價近個半月沿住保歷加中軸上升，2月8日爆升至11蚊邊，其後先整固後回穩，噚日輕輕力突破11蚊阻力收市，上升三角形阻力有機會突破，之後出現大陽燭機會唔低，睇吓繼1月初同2月初都有升勢之後，嚟緊富力會唔會爆上。
晉佳
http://fb.com/advanceguy1