足球流氓呢個問題都困擾球壇好多年，一直冇根治嘅辦法，例如出名多足球流氓嘅英格蘭，只有不斷禁止呢啲暴力球迷入場。不過，最近「戰鬥民族」俄羅斯有位議員提出咗個方法，就係將足球流氓規範化，將球迷打架變成一樣運動。
俄羅斯球迷同特首候選人林鄭月娥有個共通點，就係「好打得」！俄羅斯球迷平時操開，隨時同敵對球迷真拳真腿咁開拖。喺舊年法國嘅歐國盃，呢班俄球迷個個好似武林高手咁，將啲英格蘭球迷打到一仆一碌，都真係幾震驚歐洲㗎。除咗對抗外敵，佢哋喺俄超都會爆發內戰，喺上周六莫斯科中央陸軍對辛尼特場大波，兩隊球迷都有打起上嚟。下年俄羅斯就搞世盃，唔少人都擔心到時會有好多暴力事件。俄國國會議員列比度夫就建議，既然禁唔到，不如索性將球迷打架變成合法嘅比賽！
提議40人分兩隊球場「開戰」
俄羅斯果然係戰鬥民族，連咁都諗到！屬於俄羅斯右翼黨派自由民主黨嘅列比度夫喺個黨嘅官網度建議，每邊派出20個球迷，唔准拎武器，就喺球場入面圍毆；佢仲話，呢款球迷多人群毆對戰一定好吸引，話唔定每場都有幾千人入場睇，可以增加足球比賽之外嘅收入喎。列比度夫舉咗個例子，如果英格蘭球迷想嚟打架，就可以發出邀請，假如邀請接納，兩邊就約個時間喺球場度打。等啲暴力球迷喺比賽度打到夠、打到飽，咁自然就唔會喺場外搞事，殃及無辜啦！佢話俄羅斯將會成為球迷打架呢項運動嘅先驅喎！
向英格蘭球迷下戰書
其實俄羅斯球迷已經向英格蘭球迷發出邀請，想同呢班足球流氓嘅始祖切磋一吓拳腳功夫。上個月《BBC》播咗套紀錄片叫《俄國足球流氓軍》，入面嘅俄國足球流氓喺森林度練功，仲下戰書：「我哋嘅對手係英格蘭球迷──足球流氓嘅始祖，我哋等緊佢哋嚟。如果你嚟得呢度，就要預咗俾人踢爆屁股！」曼聯呢個周四就會出戰歐霸盃16強首回合，作客俄超嘅羅斯托夫，唔知諗住去睇波嘅曼聯球迷會唔會淆底呢？