最近跑馬見到好多只係贏馬鼻位，甚至平頭的賽果出現。好似較早前「勁勇威龍」、「勇創潮流」同「得其康」於谷草激戰，三匹馬龍爭虎當時鬥埋一嚿，最後要經過馬會影相用電眼判決幾分鐘，先至得出三甲馬匹名次。
當時因為影相罕有地耐，馬迷以為前兩駒會係平頭冠軍，最後卻由「勁勇威龍」成為冠軍，「勇創潮流」影相輸馬鼻位做阿二，「得其康」則在前駒短馬頭位之後跑第三。
所謂電眼判決，究竟是甚麼東西呢？原來就係分別設於終點線附近大樓4、5樓及頂樓位置，並最多由九部攝影機組成的一個高科技系統。
相關系統最大優點係可以記錄每匹馬過終點情況，即使兩匹馬於好近距離內衝線都好，亦能讓裁判員睇得清楚，並透過馬匹之間的衝線時間，從而計算出距離，藉此判定各駒最終名次。
好多人都混淆終點相只係一張普通圖片，其實電眼攝影範圍好精細，並且與終點線重叠。當每一匹馬衝過終點之際，系統會以最高每秒一萬次的速度，連續拍攝終點線上的影像，然後將每秒所拍下的影像排列成相片，當中每匹馬衝過終點的一刻，都會準確地記錄在相片上。
有時就算正面圖像都未必判斷到名次，終點柱亦會加設一個鏡箱。電眼連同鏡箱內的影像一同拍攝，咁就可以透過鏡面相片裁定正確名次。
為求終點圖片準確無誤，馬會要求兩張相影像差距的標準不能多於千分之一秒。有咗咁精密的電眼系統，無論啲馬仔跑得幾接近都好，都可以判斷到名次，從而為馬迷利益帶來應有的保障。