特首戰開打，場外場內一樣熱鬧。卸任立法會議員嘅工聯會榮譽會長陳婉嫻喺《am730》專欄撰文論跑馬仔，話選舉從來都係teamwork，近年卻聽到唔少「他們沒有幫我」、「我自己跑咋」、「我獨立㗎」等要同人劃清界線嘅言論，佢自己就睇唔起，「既然獲得協助，又何需閃縮！」
嫻姐雖然冇指名道姓，但如果套入特首戰，矛頭似乎指向林鄭月娥。坊間盛傳中聯辦為林鄭拉票，建制派亦群星拱照呢位新貴，但林鄭多番堅持選舉工程係自己搞，聽在打滾政圈多年嘅嫻姐耳裏，肯定諷刺！
「自己跑」自欺欺人
嫻姐仲不滿有啲人唔想所謂「被染紅」，強調佢哋嗰輩嘅「紅」係出於政治、意識形態嘅信念同堅持；除非覺得非常負面、甚至係災難，否則點可以唔承認所獲嘅支持？而獲建制團體、有中方背景人士嘅幫助，喺廣闊嘅政治光譜中正常不過，總之自稱「是我自己跑」之說係唔夠老實，甚至自欺欺人。呢番疑似對林鄭嘅當頭棒喝，莫非都係因為愛之深、責之切？