長實地產（1113）推樓盤一向花臣多，噚日宣傳旗下荃灣西項目「海之戀」，就搵嚟組合C AllStar到場助興，演唱佢哋派台歌《一刻戀上》，兼做埋樓盤廣告主題曲。兩大揸盤人、長實地產投資董事郭子威同高級營業經理封海倫仲即場一齊大合唱。
個盤同隻歌都有個「戀」字，歌詞又提到「青天碧海」同「海風正涼」，同樓盤名夾到呢，話唔係度身訂造睇怕都冇乜人信。長實話，整個項目嘅廣告宣傳費逾千萬元，C AllStar亦將遠赴海外，為樓盤拍攝廣告，認真落本。
長實以前都試過用主題曲推盤，好似容祖兒2003年為旗下長沙灣樓盤泓景臺唱咗首《我的驕傲》，據講容祖兒當年有六位數酬勞。2014年長實賣大埔嵐山第一期，亦搵王梓軒唱咗首《千色》，不過就唔算hit。
