同太太鄧小婷育有兩子兩女嘅退休法官胡國興，喺特首選戰中越戰嚟越勇，前晚喺只得佢同林鄭願意出席嘅民主思路論壇上，雖然疑似被主持人之一嘅湯家驊同林鄭夾擊，但表現淡定唔輸蝕，仲喺一啲提問上K.O.林鄭贏掌聲。
帶病舌戰林鄭
八方聽聞胡官前晚帶病上陣，仲要連胡太都肺炎入院，但胡官依然好專業咁全神應戰，戰鬥力十足。
胡官競選辦同八方證實，胡官有幾聲咳，冇乜大礙；至於胡太，確實係肺炎入院，但冇任何補充。
其實打仗之時，「情人」嘅慰藉相當重要，而胡官獲得嘅慰藉仲要打孖上。佢喺facebook發帖話自己有兩個前世情人，「好多人都話，爸爸比較錫女、媽媽比較錫仔」，繼而表明，「我仔女一樣咁錫，但始終都係女嗲D」。
到底有冇偏心？齋睇文未必一目了然，睇埋胡官上載嗰張親密「攬女照」，相信大家就會知多啲！