特首候選人曾俊華大搞「曾•connect」，由佢紆尊降貴直接打電話畀小市民，藉機hard sell政綱同表現親民作風，有網民曾經講過，論「玩電話」，點少得當年喺商台節目〈老人院時間〉玩電話玩到出神入化嘅軟硬天師呢？噚日當年嘅節目主持人林海峰就打畀薯片叔，雙方隔空過招兼寸爆豪裝官邸嘅新財爺陳茂波。
繼森美、陳慧珊後，商台DJ林海峰亦成為薯粉，佢同薯片叔通電時話預祝對方當選；薯片叔則話林海峰係佢好欣賞、好叻嘅朋友，因為林海峰話薯片叔成日connect人，所以想打去connect佢。
「佢搞幾年要好多錢翻新」
兩個風趣人士，好容易擦出火花。林海峰開腔冇耐就問薯片叔點解住到個司長官邸咁爛，搞到要用80幾萬公帑維修，揶揄陳茂波花費巨額公帑裝修財爺官邸，又笑指薯片叔一旦當選，香港畀佢搞幾年就要花好多錢「大翻新」，薯片叔回應時都顯功架，講完唔好意思，話自己「唔係瞓地」，暗寸波叔用39萬復修地台、4萬元更換破損地毯。
林海峰其後大讚薯片叔嘅宣傳短片《不如相信每一個人》好睇，但希望對方拍得好之餘都要做得到，寄望薯片叔唔好變成「前幾年我哋熟悉嘅嗰種特首」，直線批評現任梁特，同時叫薯片叔當選後唔好由「曾•connect」變成「disconnect」，要同大家保持住聯繫。
薯片叔笑笑口回應：「應該要改變一吓，𠵱家呢個地方要包容好多。」承諾會繼續connect，強調同多啲人傾偈係好事。
李八方