香港人口老化，女性生育率偏低，早已不是新聞，真正嘅新聞應該係特區政府如何面對及提出方法來解決呢個長期結構性問題。2017年度財政預算案由財政司司長陳茂波提出撥款三百億元作「安老基金」，算係第一步大動作，但預算案並無提及呢個基金如何運作，如何管理及有何具體計劃，唔通只係他日給基金撥款津貼私家安老院就了事？
左丁山年青時候，政府大力推動節育，成立家計會負責其事，家計會早年嘅宣傳太有效，例如「一個嬌，兩個妙，三個斷擔挑」，嚇到左丁山一代唔敢多生幾個，所有朋友同學結婚後都係一個起，兩個止，甚少有三個兒女嘅，生到四個更係少之又少，相比左丁山阿媽生四個，外母生七個嘅情況，香港節育計劃可以講得話非常成功。勢估唔到，到左丁山仔女大晒嘞，依家聽到嘅家計會廣告，係宣傳家計會可以幫助夫婦解決性生活嘅問題，睇嚟家計會要更改名稱至得。
經濟學家當然認為節制生育之成功，主要係養育機會成本愈來愈高之故，西方國家女士（如瑞典、法國、德國）生育一個孩子嘅機會成本一定係莫三鼻給、喀麥隆、菲律賓等等地方女士之機會成本嘅幾倍，西方女士與香港女士都要追求個人生活空間與時間，要在職場打拼，那肯消耗大量時間來生育六七個兒女？一個已經夠晒數嘞，金融時報（二月二十五日）報導，中國十八個月前終止自1979年開始雷厲風行之一孩政策之後，發覺中國出生率仍然冇乜增加，在一啲省份，生育率即使有增長，但增長甚微，於是乎，中國人中位數年齡繼續上升。湖南省統計局建議政府可以提供幼兒津貼，照顧兒童生病可以有額外假期，增加產假等等。依外國實證經驗睇，呢類津貼、假期、產育優惠等等所生嘅效果並不理想，西歐國家已經多年來提供類似產育福利，婦女生育率還是持續下跌，當代婦女根本唔希罕，當今中國婦女正享受幾百年來最富裕嘅中產生活，住在城市，做白領職員，自不然也產生旅遊慾望及嚮往無拘束生活，那會為了津貼假期福利而多生嬰兒！前星期紐約時報有一段報導，甚為有趣，瑞典一個小鎮Overtornea有議員正式建議為鎮政府550名僱員提供一小時有薪sex break，讓丈夫回家與太太享受敦倫之樂，就好似tea break，coffee break之類，當然只限於夫婦之間，本來以為係無稽之談，點知引起全國議論紛紛，爭辯sex break會否提高瑞典生育率還是鼓勵男女偷情！