港交所（388）今年業績麻麻地、冇驚喜，但一班非執行董事依然有人工加，尤其係即將卸任嘅郭志標、李君豪，加幅更係全體之最。
郭志標舊年袍金總共160萬元，按年增12.7%，李君豪都加咗8.5%，有108萬元。兩位都會喺今年4月股東大會後退任。兩位之外，加幅最高嘅就係高盛（亞洲）顧問董事范華達（Tim Freshwater），佢加咗6.4%，有成102萬元袍金。唯一被減人工嘅非執董就係夏理遜，今年得249萬元，減咗成4.4%。
港交所13位董事，除咗行政總裁李小加係執行董事之外，其他都係獨立非執行董事，其中6位由持股5.88%嘅政府委任，餘下6位就係股東選任。非執董嘅報酬，係由外聘顧問公司分析之後畀意見嘅，呢兩年都係用McLagan，參考其他上市的交易所、銀行、富時100指數及恒指成分股嘅董事袍金釐定。