禮賓府噚日開放畀市民參觀，雖然花卉依舊，但人面卻有啲唔同，近年每逢禮賓府開放日，都會現身同市民見面嘅特首梁振英，因為要列席全國人大會議開幕，噚晚先至搭夜機返港，冇得以主人家身份招待市民，但仍然有過百市民喺開放前已經喺門外等候。
梁特唔在港，示威者都冇乜動力去禮賓府，噚日唔多見有市民喺府內請願抗議等，但禮賓府外如常設有安檢區，禁止市民帶違禁品入場，例如示威標語等。而唔知係咪因為今年氣候較暖，府內唔少杜鵑及玫瑰，唔係凋謝咗就未開花，相信都令唔少專程賞花嘅市民失望，有過往曾到禮賓府賞花嘅市民則話，杜鵑花嘅數目同種類都較去年減少。