跳唱女子組合FFx前成員楊澤怡（Shirley）前晚現身撐警集會活動，並擔任主持及表演嘉賓，佢喺活動後接受《蘋果》電話訪問時透露參加活動嘅原因：「我好希望香港人可以繼續努力去尊重我哋嘅執法團隊。」
提到7警嘅暗角事件，日前被法庭判罪成入獄，其中6人提出上訴。Shirley就咁睇：「我覺得佢哋本身係好訓練有素，佢哋係唔會無緣無故去犯法囉！咁其實佢哋係有原則嘅，所以要考慮到嗰個情況而去話佢哋係咪犯法，要去了解咗個case先。（但啲警察拉咗曾健超去暗角位）我覺得佢哋都係好努力咁去工作，當時佢哋又的確係面對緊好大班嘅暴徒，咁除咗呢件事之外，佢哋都為香港嘅巿民付出咗好多，所以就算係要判的話，都應該係可以輕判囉，唔至於o依家咁重。」
問到Shirley有冇參予過雨傘運動？佢話：「冇，因為我嗰陣時仲係讀緊書，仲係做緊組合，因為要去上堂同表演，都冇時間去，同時我亦都覺得有啲…點講呢？喧鬧成份囉，有啲嘩眾取寵，而我好多身邊嘅同學去係為咗一齊玩，而唔係真正去了解成件事。」
話晒Shirley都係歌手，問佢驚唔驚出席撐警活動會政治敏感，甚至被人話刻意討好中共？Shirley話：「其實都唔會話驚定唔驚，咁香港有言論自由，香港人係有權利去發表意見，其實我本身係香港教育學院畢業，亦都係一個兼職小學老師（代課），我覺得有義務去教育下一代。」
問到Shirley點解喺活動上唔係唱大會改編自《奮鬥》嘅撐警歌《為正義奮鬥》，反而係唱佢首新歌《天燈》？Shirley話：「因為其實我哋想擺好多唔同類型嘅歌落去，我呢首《天燈》係有喻意嘅，係希望大家嘅願望、所有嘅心聲可以發佈到出嚟，好似天燈咁樣樣，就會順利成功，歌詞都有講到話有一日其實我哋都希望會取得個勝利。」
Shirley仲講到，前晚係正義聯盟黨主席蔡克健搵佢幫手做主持同表演，Shirley話本身同蔡克健係識嘅：「佢本身都係電影導演嚟嘅，咁我又幫佢拍過電影，所以認識，大家傾開個理念相同，所以今日可以過嚟幫手。（活動多唔多人嚟撐場？）今日都多，過千㗎！」