楊寶玲(Pauline)係87年《香港小姐》冠軍，同屆亞軍李美鳳及季軍林穎嫻，都被喻為高質素靚女。
Pauline憑著美貌與智慧兼備，代表香港贏得世界性選美獎項，包括在英國參加《世界小姐競選》進入最後12名，並奪「亞洲皇后」；其後在台灣舉行嘅《環球小姐競選》中，勇奪第5名，為港姐海外選美史上，寫上最漂亮一頁。不過，Pauline嘅感情世界有點崎嶇，先後有三段婚姻，94年喺澳洲秘嫁首任丈夫、新加坡音樂人陳容森，3年後離婚被男方力數不是，仲公開兩人嘅閨房事。02年，楊寶玲下嫁美國凱撒皇宮賭場市場部亞洲區副總裁黃延年，兩人育有一子Nathan，2014年離婚收場。今年初，楊寶玲被爆與初戀情人Gav結婚，兩人喺英國讀書時認識相戀，雖然都曾經歷婚姻失敗，Gav有兩女兒，但現在一家五口生活美滿。
而亞軍李美鳳就有電眼美人之稱，90年曾與林敏驄喺加拿大秘密註冊，婚姻維持咗5年便告離異。96年，李美鳳改嫁予台灣富商鄭翔中，前夫林敏驄稱之為「釣到大龍躉」，其後李美鳳為鄭家誕下一對龍鳳胎，喺台灣定居，過住少奶奶生活。
至於季軍林穎嫻，選完港姐後亦代表香港參加《國際小姐選競選》，並奪得「最上鏡小姐」。不過，林穎嫻好快就放棄事業，99年喺美國與Tom Dupont結婚，育有一子兩女，分別喺04年誕下大仔Teddy、06年誕下大女Michelle及08年誕下小女兒Julie，專心相夫教子，樂做全職家庭主婦。