全國兩會係本地建政派政治活躍高峯期，北京金魚胡同馬會會所飯局不絕，建制中人坐埋都在問：「習大大挺林鄭？」大家仍然係用問號。本來挺梁撐林之張德江出席港澳政協聯組會議，只係照本宣科，重申早前王光亞所提特首必須符合的四點要求，並冇明示暗示欽點了林鄭。兩會第一仗政協表態，有多少反高潮，本來有心人四出放風表示將有中央要員表態挺林鄭，點知全數落空，惟有留待更高一級第二場大龍鳳人大會議。
林鄭提名前幕後操盤手谷盡，用犯法手段向選委表示中央唔會欽點曾俊華，監硬拆走原本ABC陣營提名票，以為公開提名就等如畫押，跟手吹風話西環有辦法追查選票，刻意製造恐慌。更毒係用周融及左報宣傳系統，將曾俊華上綱上線為代表顏色革命、勾結外國勢力，用老左慣用手法，拉高矛盾逼所有建制派選委歸邊。
從提名可見，表面上林鄭陣營應有700票以上，因為西環鐵票隊：勞工界、中企、港九區議會都未出動，但原本在西環強力動員下公開提名林鄭的本地工商界，即ABC陣營中堅分子，有幾多在暗票下流失重回曾俊華懷抱呢？
回顧12月至今政局發展，本來ABC加上泛民300+，係有能力造王，我一直認為這是共產黨為何在選委選舉前夕DQ 689主因，就是計來計去，手上冇辦法控制到601張票。而曾俊華也在積極備選，明顯當時ABC陣營是支持曾俊華，並用他討價還價，逼中央DQ 689。這解釋為何從不冒政治風險的曾俊華會突然勇武起來，因為當時反梁陣營的而且確足以推他上馬。這突如其來的變化，令西環立即變陣，放棄自己友葉劉淑儀，改為支持表面形象較中立、政治可塑性較高的林鄭，認為此舉有利拆散ABC陣營。起初估算因為梁振英個人作風才令ABC團結起來，當梁因素消失，自然可拉回唐營人馬。但事實證明太樂觀了，林鄭政治形象急劇惡化變成689 2.0，西環越着急造王，林鄭民望就越急速蒸發。這時ABC又有重新集結的機會。
上周六300+已通過會集體投予民望最高一位候選人，而另一關鍵是台前奔走的田少又可否撬走200票，這兩者是有關連。曾俊華如能穩住326張泛民票，則ABC歸隊機會大增。若果曾俊華弱雞到連基本盤都冇，ABC自然唔會得罪共產黨官僚之險投票畀佢。2012年選舉中唐營大勢已去，中央指令選委要投票畀梁振英，但最後唐英年仍有285票，只是走了百多票。這個以本地工商界勢力為主的ABC陣營，基本票應以285起計。雖然大家表面見到唐英年肉麻地挽着奶媽手臂，但究竟本地工商勢力，是真心聽命於西環治港嗎？我看未必！
這就是為何左報要上綱上線，將曾俊華往死裏打，定性為勾結外國勢力，同泛民沆瀣一氣的原因。因為無論有冇欽點，當主要矛盾又變回西環治港時，ABC將再度集結，而一切又回到12月初時，林鄭幕後操盤手點會唔心急！
添馬男