係咪選戰期間，總會令人無限感觸？成功入咗閘，準備緊喺往後連串選舉論壇同林鄭月娥胡國興撼過嘅曾俊華，上星期五去到灣仔運動場，為喇沙仔師弟打氣，佢之後就喺灣仔碼頭坐渡輪去尖沙嘴見選委，點知一程小輪，勾起佢唔少那些年往事，暗示呢次參選都係今生無悔咁噃。
薯片叔喺facebook貼文，話年幼時香港交通極之唔發達，過對面海係一件大事，但係喺今時今日坐渡輪，卻已經成為緩慢嘅象徵，維港兩岸亦變成世界聞名嘅景色。
憶起做關長經歷多
佢憶起當年擔任海關關長、即係人生首個主要官員職位時，都要成日坐船㗎，數數手指，當年上任關長首日距今，嘩，原來已經成10幾年咯，但當年好多經歷、困難同故事，至今歷歷在目。可能望海嘅薯片叔有感觸，佢話此程亦令佢諗起各校運動員嘅投入，以及現場熱血沸騰嘅氣氛，直指係人生無可取代嘅經歷，坦言：「青年人在球場流過汗，灑過淚，才是青春無悔」，佢話好希望5年後再坐渡輪，會諗起今年宣佈參選，係人生中最好嘅決定喎！
而喺po文之時，專頁亦貼咗張薯片叔喺碼頭睇緊新聞嘅相片，而報道嘅主角就係佢嘅選戰勁敵林鄭嘞，果然知己知彼！渡輪上，懷念你說生如戰士，披咗戰衣嘅薯片叔，相信已經滿載清醒再次開始……
李八方