正所謂有危自有機，皇家馬德里西甲榜首位置俾巴塞隆拿搶咗，上周六作客伊巴，更加有基斯坦奴朗拿度（C朗）因傷缺陣，艾華路莫拉達、加里夫巴利兩位主力停賽，不過靠眾志成城，全隊不斷奔跑，一樣以4:1勝出。皇馬已經連續45場比賽有波入，打破埋巴塞1942至44年之間嘅紀錄㖭。
賓施馬回勇入兩粒
皇馬BBC組合今仗只有賓施馬出得，好彩呢位法國前鋒及時回勇，喺14同25分鐘建功，係佢自2015年11月後再度幫皇馬梅開二度，加上占士洛迪古斯同馬高阿辛斯奧都入一粒，就算伊巴靠前鋒魯賓彭拿尾段破蛋，皇馬仍然以4:1大勝。皇馬雖然叫做銀河艦隊，不過呢班星都知道落場就要拼盡，今場波皇馬總跑動距離係102.36公里，比伊巴仲要多三公里，馬高阿辛斯奧、卡斯米路、盧卡斯華斯基斯同拿祖費南迪斯四個人都跑咗10K以上，真係夠晒勤力。雖然今場贏波，不過仲有一點令教練施丹唔開心，因為尾段失守，係門將基羅拿華斯今季第32個失球，數番佢上季成季都只不過失31球，皇馬後防線確實冇上季咁穩。點都好，皇馬贏波後仍然以一分落後巴塞，不過就少踢一場，周二就要應付作客拿玻里嘅歐聯16強次回合比賽。