噚日係驚蟄，過百市民下午喺銅鑼灣鵝頸橋打小人，「啪啪」聲響徹橋底。有多年打小人經驗嘅金師傅話，今年係歷來最少人，其中原因係社會嘅氣氛緩和咗，仲話今年冇人打政治人物，「換新特首啦嘛，佢哋唔知打邊個，咪冇人打囉……往年有人打（特首）梁振英，今年就冇，打佢都冇用啦，佢都退休（不連任）」。
做小生意嘅陳先生第二年到場打小人，主要求順利，但想打前財爺曾俊華，強調唔係打人，而係打佢個位，因為曾年年估錯數，政府有大筆盈餘，但又唔惠及大眾。佢話過往有朋友喺網上打梁振英，但自己今年唔打梁，「佢退位我就唔打啦」。
台妹來港打壞男人
現場亦有唔少旅客，台灣嘅許小姐話香港嘅打小人好出名，仲話去年感情狀況唔太好，「遇到壞男人，打掉一些不好的」，下次來港都會再打小人。