負責領導政府醫療、衞生同食安政策嘅食衞局長高永文，一向畀人正面健康嘅印象，但佢噚日出席「世界腎臟日在香港」活動時，自爆以前其實唔係咁健康。
03年肥到160磅
佢憶述2003年「沙士」爆發前，重到160磅，有段時間俾傳媒訕笑做「肥高」，之後10幾年體重都係咁上下水平徘徊，直到年半前就去到140磅左右，但因為怕糖尿病纏身引發腎病，所以都要搵營養師「指導」；身高約1米75嘅佢，𠵱家減到130磅，換言之BMI已經由十幾年前嘅大約23.7（即係超重），回落到19.5左右（即係正常），糖化血紅素（HbA1c）指數亦由「踩界」嘅6.5度，減到5.5度！
之不過呢，民望高仲覺自己未夠健康，皆因之前驗尿素嘅結果係超標，相信因為自己每日飲唔夠8杯水。