楊千嬅噚日喺沙田體院出席「智樂開心小熊醫院2017」籌款活動，千嬅笑話睇見現場表演嘅小朋友，搞到自己好有再生BB嘅衝動：「睇到啲小朋友好開心，同埋𠵱家一個就緊張啫，可能生多一、二、三、四個就冇咁緊張。」不過想還想，最快都要明年先可以實行，佢話：「講到好似啤嘢咁，要睇吓廠期先，其實我哋都好鍾意小朋友，Torres（囝囝丁進諾）都有㗎，成日喺屋企話悶，仲指定想要個sister。」
「隻野獸都好真」
講到電影《美女與野獸》（Beauty and the Beast）涉及同性戀內容，搞到俾家長投訴，作為家長同演員嘅千嬅，就話都有睇過預告片：「我覺得作為production好勁，當然，做電影宣傳之前要講明，令入場觀眾知道乜嘢事。好似我個仔咁細，我都會篩選內容先，唔講係咪同性戀，隻野獸都好真實，我會自己scan咗先。」佢認為電影創作空間好大，只要有家長指引就得：「唔止係迪士尼先拍呢個題材，亦唔會只係睇一套迪士尼先認識（同性戀），同性戀電影有好多，我𠵱家教佢基本性教育，尊重男女嘅概念。我嘅角色只可以輔導同灌輸價值觀，將來條路就佢自己行。」
撰文：馮仁昭