對當弗射手嚟講，要諗一個全新入波慶祝方式，就似乎比入波仲要難，上周六西甲、意甲同德甲三大聯賽嘅前列射手，包括巴塞隆拿嘅美斯、拿玻里嘅梅頓斯同埋多蒙特嘅奧巴美揚，都齊齊有波入之餘，仲有新嘅入波慶祝方法。巴塞主場以5:0狂數切爾達，梅開二度嘅美斯慶祝方法係扮打電話，但就唔係向《少林足球》阿三師兄田雞致敬，而係向佢嘅侄仔道歉。
巴塞教練安歷基宣佈教埋今季就離隊，傳聞同佢有牙齒印嘅美斯，當堂生番晒，上周六又入兩粒，兩場波入三粒，西甲入球增至23個，拋離隊友蘇亞雷斯排射手榜首。佢入波之後就整咗個打電話手勢，有網民就估，唔通係向巴塞高層示意，要求佢哋快啲搵佢續約？原來慶祝方法又唔係咁複雜，美斯賽後就解釋，佢有個侄仔，之前打咗好多次電話畀佢，不過佢唔係練緊波就比賽緊，搞到miss call，美斯做呢個手勢就係補償番畀侄仔。講開巴塞，安歷基唔做之後就連續兩場大勝，仲要加埋入11球，唔通同美斯等骨幹球員不和係真？
梅頓斯扮黃狗射尿
以18個入球排意甲射手榜次席嘅拿玻里翼鋒梅頓斯，上周六又有入波新搞作，喺作客對住羅馬嘅二、三哥大戰，梅頓斯先開紀錄後，就走去角球旗趴低扮狗爬之餘，仲抬起右腳「黃狗射尿」㖭。堂堂球星走去扮狗，你以為係中國國腳鄭智咩？不過，梅頓斯咁做原來為咗佢嘅愛犬Juliette，仲話將入球送畀Juliette㖭。最終拿玻里以2:1贏波，追到只落後羅馬兩分。
奧巴美揚頭染一剔
多蒙特前鋒奧巴美揚上周六就威盡德甲，個人梅開二度後，助球隊以6:2狂勝利華古遜，以21球續排德甲神射手榜首之餘，累積75個入球過埋轉投拜仁慕尼黑嘅羅拔利雲度夫斯基所保持嘅球隊紀錄。奧巴美揚入波後打個斛斗，表面睇冇乜嘢，不過側額兩邊有啲紅色嘢，原來係某體育品牌個一剔logo。奧巴美揚嘅波砵贊助係一剔，自己賣吓廣告就冇問題，最大鑊係多蒙特由「豹牌」贊助，多蒙高層事後就話搵吓奧巴美揚傾傾，叫佢以後唔好再咁做嘞。
