做得演員嘅，咪睇好似好多人都身光頸靚，真係好多唔同場口都要頂，例如：摷垃圾筒。史上有唔少演員都同過垃圾桶同場，同生物類演員一樣，都有難頂同易頂之分。
謝霆鋒
霆鋒喺08年拍攝電影《証人》時，有一場要去垃圾站執垃圾搵證物嘅戲份，有哮喘病霆鋒當年為撲奶粉錢，要喺臭氣熏天垃圾房內焗一粒鐘，難受程度可想而知，霆鋒喺拍攝其間更一度出現輕微呼吸困難。而霆鋒為咗更加似真係摷垃圾，應導演要求整污糟對手——即場用一個焗飯倒落手，捽勻啲餸汁同飯，先落手摷垃圾。
胡杏兒
曾經係大台花旦嘅胡杏兒，喺07年同羅嘉良拍攝劇集《當狗愛上貓》時，亦有一場摷垃圾嘅戲，而喺佢摷完一大輪後，仲同劇中失散嘅愛犬重逢，更獲愛犬熱情送吻。當時同場嘅羅嘉良話好彩外景場地個垃圾站都乾淨，啲垃圾桶好似冇乜用過咁，令杏兒唔使搞到一身污糟臭崩崩。
馬德鐘
有「馬神」綽號嘅馬德鐘一樣難逃要摷垃圾嘅命運！佢喺11年，拍攝大台劇《飛虎》時，亦有一場要喺街頭摷垃圾嘅戲份，當日佢率領羅仲謙及梁烈唯等「隊員」，着住套飛虎制服狂摷垃圾，拍到一頭汗。
楊冪
屢傳與劉愷威婚姻不穩嘅楊冪，喺結婚生女後繼續喺演藝圈發展，佢喺前年出席電影《戀愛中的城巿》個記者會時，透露同合演嘅台灣小生鄭開元為咗一場搵嘢戲，喺布拉格最大嘅垃圾場捱咗半日，仲話自己拍完之後差啲呼吸唔到，認真係「辛苦錢」。