呢幾日天氣好似好乾燥咁，原來係耍人；天文台老友報料話，周一（6日）一股潮濕嘅偏東流殺到嚟，相對濕度係……「100%」，呢啲天氣玩死人，啲抽濕機又係時候出動。費清啲窮L間屋細到無倫，放部抽濕機就無咗幾格磚，都係等回南天殺埋身買盒吸濕大笨象頂檔。
專賣日本產品JC Shop Francis都話，依家啲樓價高處未算高，即使上到樓都係啲200幾呎「劏房樓」，啲地方就係唔見使；日本都有咁嘅情況，近年推出唔少Mini抽濕機應巿，其中一款日本USB迷你流動抽濕機，就可以講喺劏房樓救星。
Francis話，部機透過半導體製冷技術，將吸入機組入邊嘅濕氣進行冷卻，再將變乾既空氣排出，因為唔係用傳統壓縮機，體積大幅減低，只有150 X 130 X 225mm，即刻好以一個頭咁大，一只手掌到托得起；抽濕嗰陣大約48分貝，冇乜聲都幾靜。
佢話部機用USB插尿袋供電抽濕，可以直接放入衣櫃、鞋櫃重點抽濕，唔怕漏電着火；接駁 8,000mAh尿袋，最長可抽到6粒鐘。不過水箱容量就只係得500ml，抽滿咗自動會停，倒水可能就要頻密啲。如果唔想倒水咁密，建議都係買番部大啲嘅抽濕機，抽濕量起碼有番7、8L。
提醒番，每年回南天，都發生使用抽濕機不當火燒屋嘅新聞，費清聽到都心驚驚；消委會等專家教路，一定確保抽濕機嘅出風口、吸風口唔好被阻擋，阻礙散熱，定期除塵，以免灰塵積聚喺絕緣體引致洩電；當然唔好獨留開動嘅抽濕機喺屋企，同理唔好長期開，聞到異味或聽到異聲，立即關機，搵專人檢查。
費清＃要生計，也要生活＃毋忘初衷