之前提過，馬化騰旗下騰訊（700）計劃將內地最大網上文學平台閱文集團分拆來香港上市，公司仲揀咗情人節叫各大投行走去做pitching，行內稱之為「選美」。聽講公司好快已經有心水，揀咗摩根士丹利、瑞信、美林三間美資投行做保薦人。
如果快手嘅話，閱文集團最快今年暑假前就可以上市，大家見到「閱後即焚」即時通訊應用程式Snapchat嘅母企Snap Inc.上星期喺美國上市咁爆，應該都會加快手腳。香港近一年都冇乜知名又有睇頭嘅新股上市，馬化騰呢隻新股不難引起搶購熱潮呀。
閱文前身係騰訊文學，2013年成立，兩年後收購咗另一平台盛大文學，整合為閱文集團，成為內地最大網絡文學平台，旗下包括起點中文網、瀟湘書院、紅袖添香、QQ閱讀等品牌；擁有超過300萬冊圖書，有近1億用戶，年收入廿億人仔，集團主要透過作者上載作品吸引用戶下載，從中收取費用。