隨着巴塞隆拿教練安歷基提早宣佈季尾離隊，歐洲名帥今夏隨時再現「骨牌效應」！其中阿仙奴領隊雲格屢傳帥位不保，熱刺領隊普捷天奴就同巴塞扯上關係，據意大利傳媒《Gazzetta dello Sport》報道，呢對北倫敦死敵唔知係咪見干地帶領車路士喺榜首踩行油，諗住照辦煮碗打鬼主「意」，分別邀請祖雲達斯教練艾基利同羅馬主帥史巴利堤來季過檔！一旦成事，計埋屈福特領隊馬沙利，倫敦分分鐘雲集4位意國名帥！
另外，意大利傳媒亦聲稱祖雲達斯打算開價2,500萬鎊（約2.39億港元）收購阿仙奴前鋒阿歷斯山齊士.......山神點止值25M？冇計喎，鬼叫人地肯出25萬鎊周薪滿足山神要求，阿仙奴搲爛塊面破晒戒都淨係肯出18萬鎊呢？阿仙奴就睇中多蒙特嘅馬高列奧斯、波圖嘅米基爾施華同里昂嘅拿卡錫迪接班。