上季最高分三歲馬是「佳龍駒」，果然今季踏入四歲後更進一步，已接連攻下經典一哩賽及香港經典盃，有望贏埋打吡成為首匹四歲馬三冠王。
哪麼目前全港最高分三歲馬，下季能否一如「佳龍駒」般進軍四歲馬三冠系列？睇怕就難啲，事關現時三歲馬之首95分的「海翡翠」，5捷皆1200米明顯係短途馬，就算只跑頭關經典一哩賽亦會嫌長好勉強。
其實講到有條件到進軍下屆四歲馬三冠嘅賽駒，必然係蔡約翰馬房「爭分奪秒」，至今6戰獲2冠3亞1季全上名，包括曾在1400米與「勝得威」串Ｑ而輕取季軍「喜旺寶」，呢兩匹對手都會係今屆打吡正選馬，咁你話只得三歲嘅「爭分奪秒」係咪好勁先？
「爭分奪秒」家陣已加到82分，上仗輸頸位畀「一定賺」屈居亞軍，純因當日要讓15磅之多。周日（5日）「爭分奪秒」將再出，以二班馬身份角逐第八場85分上限三班草地1200米，表面路程稍短，但12檔雷神反而可順勢騎足全程更易撻着，對手實力唔算太強，睇嚟呢場頭馬實食冇黐牙！