日前統計處公佈2016年香港人口中期調查資料。2016年香港人口有733.6萬，比十年前2006年的686.4萬增長了6.87%，共47.2萬人，平均計算，每年人口增加不足4萬8千，以2016年為基數，增長率為0.69%，是一個很低的數字，何況增加的人口中，還包括大陸移民在內。
人口增長速度慢，人口的平均年齡自然向上升，故此2016年的年齡中位數為43.4歲，比2006年的39.6歲上升了3.8歲，65歲以上的人口也由85萬人增加至116萬人，佔總人口比例上升至16%，按今時今日的遲婚遲生育趨勢推算，這比例還會不斷上升。
人口狀況如此，唔怪得老人演唱音樂會不斷舉行，最近宣傳得多嘅Tom Jones演唱會就係一個例子，Tom Jones喎，1940年出世，依家已經過咗76歲生日，1965年即係52年前成名，成名半個世紀，仲有市場？有，就係迎合老人長者市場吖嗎！張學友開演唱會20幾場，場場爆滿，炒飛貴到飛起，你估係20零歲嘅年輕人買得起咩，多數係四五十歲嘅「熟女熟男」，追捧咗張學友成二十幾年嘅粉絲，正正就是今天年齡中位數43.4歲嘅人士。
香港人口一啲都唔年青，故此左丁山不明白不少機構講市場推廣，開口埋口就話「年輕化」，酒樓年輕化，報紙年輕化，遊樂場年輕化……其實只係口號，不切實際，年輕化嘅市場愈來愈細，年老化市場愈來愈大，市場推廣人士唔好噏得出就噏！譬如中環有兩三間老字號由第二代或第三代掌舵後，一聲年輕化，舊嘅慢慢冇咗，新嘅不合食客胃口，真正年輕人又冇錢入去食，結果就係兩頭唔到岸。
旅遊H對左丁山講過，近十年最興旺嘅遊覽產品就係遊船河，生意穩定上揚，年年有增長。旅遊H見到郵輪生意逐漸競爭加強之後，又同歐洲商人合作辦遊河船（river cruise），唔坐大郵輪去加勒比海、地中海，而係坐中小型船隻漫遊多瑙河、萊茵河、塞納河，更加悠閒舒適安全，但參加者一定要有大把時間，慢慢嘆至得。邊啲人呀，咪就係退休人士囉！旅遊H話差不多每次辦團，參加者年齡都在60歲以上，個個唔駛趕返工嘅，所以呢行生意一定唔駛搞年輕化！此乃大勢所趨，揸住本人口調查報告去搵市場，開發新產品，方是上策。