捐血係無償嘅，捐精就曾經有錢收，但家計會2008年已關閉精子銀行，冇得再捐精收$300，但最近捐嘢又有錢收，而且仲要係捐屎。話說有間叫亞洲益菌中心（Asia Microbiota Bank）嘅機構，誠邀各位健康寶寶參加腸道益菌捐贈計劃，每捐一次屎，就會獲贈交通津貼200蚊！
睇番個網頁，佢哋聲稱係研究機構，見到近年腸胃病困擾唔少都市人，而糞便移植治療成效慢獲醫學界承認，所以想透過收集健康腸道益菌，幫大家以全天然、低副作用嘅方法醫治各類腸道疾病。
點捐法先？首先你要介乎18至50歲，BMI指數30以下，有健康腸胃同過去3個月冇食藥或者抗生素，就可以上呢個網站（ http://www.asiabiobank.com ）填番張form留低名、電話、年齡等等基本資料申請成為捐贈者先，中心會寄健康狀況問卷畀你填。
如果pass咗問卷，下一步中心會叫你上去中環辦公室做驗血、驗尿同糞便測試，確保真係健康寶寶，就成功晉身捐贈者啦！捐屎者每星期自選3日去中環office捐屎，每次中心都會畀番200蚊車馬費津貼，計計埋埋，一個禮拜600蚊，一個月啲屎咪值成2千幾蚊？中心標榜最多賺到4,800蚊一個月喎！
捐屎者係咪要即場屙出嚟？上到中環office，就要即刻屙到喎，否則咪要職員等，好尷尬喎。咁如果去之前食香蕉等滑大腸通便，又會唔會反而未去到office已經屙咗，咁又點算？（費清可能真係諗多咗．．．）
仲有，咁多個人健康資料畀晒間中心，佢哋會點處理先？費清聯絡過中心，不過佢哋一路潛水未答。
其實，糞便近年被認為係腸道疾病患者的救星。中文大學都嘗試以「糞」治腸，透過糞便將細菌植入患者腸道，治療效果較服用抗生素殺菌更佳（回帶： https://goo.gl/cK7u0s ），但當然要由專家指示啦，唔好以為求其食落肚就醫到。（應該冇人咁諗啩，唔好嚇喎．．．）
費清＃要生計，也要生活＃毋忘初衷